А. Имановтың 145 жылдығына орай «Рухани жаңғыру» бағдарламасы аясында Лисаков Жоғарғы Тобыл тарихы мен мәдениеті мұражайының қызметкерлері қазақ халқының 1916 жылғы ұлт-азаттық көтерілісінің қолбасшысы, халық батыры Амангелді Имановқа арналған бірқатар іс-шаралар өткізді.

2018 жылдың 28 мамыр күнінен бастап мұражайда Қостанай облысының тарихи-өлкетану мұражайы қорынан алынған фотосуреттер мен құжаттардың көшірмесі пайдаланылған «Амангелді Үдербайұлы Иманов 1873-1919» шағын көрмесі жұмыс жасауда.

А. Имановтың қызметі туралы жылжымалы көрме дайындалып, ол көрме Лисаков орталық кітапханасында, Лисаков кәсіпорындарында (ККББ, РМО), қаланың оқу орындарында (Лисаков қаласы әкімдігі білім бөлімінің «№3 орта мектебі» КММ) қойылды. Мемлекеттік тілде оқытатын № 3 орта мектебінің 8-11 сынып оқушылары үшін мұражайдың ғылыми қызметкері А. Қ. Қадырханова  А. Имановтың 145 жылдығына арналған «Азаттық үшін алысқан ер» тақырыбында дәріс өткізді. Дәріс барысында тыңдаушылар А. Имановтың жерленген жері «Қазақстанның киелі жерлер географиясы» жобасының республикалық маңызға ие нысандар қатарына кіргендігі туралы, Ұлы тұлға өмірі жайлы тыңдап, оның ерлігі жөнінде баяндайтын бейнематериалдар мен кітаптарды тамашалады.